عيد سعيد كل عام وانتم بخير

كل سنه وانتم بصحه وسلام انا قولت اعيد عليكم ونفرح كلنا سوا

يارب نكون حققنا كل إلى كنا عاوزين نحققه فى شهر رمضان الكريم

وقدرنا نغتم منه ونكفر عن جزء ولو بسيط من اخطأنا

وتقبل الله منا ومنكم

وكل سنه وانت طيبين

احلي تاج من اغلي صديق

أولاً انا باحب اشكر الأستاذ محمد حامد المحاسب العظيم صاحب مدونه حدوته إلى اهداني التاج

وده كان شئ غير متوقع منه بس الحمد لله انه عمل طيب واهداه ليا لانه لو ماكنش بعت التاج

ليا ما كنش هيعرف ألى هيحصل له بس الحمد لله ربنا نجاه مني ولله الحمد

انا اسفه طولت عليكم ودلوقتي نبدأ الإجابات

ســ 1 : الحالة الجسمانية بمعنى هل سيادتك تتمتع بصحة جيدة ولا الاخ صاحب مرض ؟
جــ 1 : الحمد لله الي اقدر اقوله فى الموضوع ده انه ولله الحمد وبعد مرور فترة 7 سنوات جواز لسه محصلتش ليا اى عاهات او اصابات مباشرة او غير مباشرة ولسه بكامل صحتي
ســ 2 : الحاله العقلية بمعنى هل تشعر ان عقلك يعمل ولا حضرتك مفسى دماغك ؟
جــ 2 : من ناحيه الدماغ بقي فانت عارف بقي ان لما دماغي بتشتغل اجارك الله مني وخصوصاً لما بوظفها فى المشاكل يا سلام مصايب يابني ربنا يكفيني شر دماغي
ســ 3 : الحاله الاجتماعية بمعنى هل علاقتك بمن حولك جيدة ولا عامل مشاكل مع طوب الارض ؟
جــ 3 : والله يا حامد باشا انا مقدرش اقول ان ما فيش مشاكل مع إلى حوليا لا فيه بس قليل جداً لكن والحمد لله ناس كتير بتحبني وانا باحبهم وإلى انا مش عجباهم هما احرار يشربوا من البحر
ســ 4 : الحاله العاطفية مش محتاجة تفسير ومش عايز استعباط
جــ 4 : اكيد طبعاً انا داخل نطاق الخدمه لاني متجوزة وبحب جوزى وبنتي وبيتي
ســ 5 : الحاله الروحية بمعنى هل علاقتك بربنا كويسة ولا الكلام على ابو لهب ؟
جــ 5 : هتندهش لما اقولك انا علاقتي بربنا انا شايفاها مش كويسه انا مقصره طبعاً فى اداء الواجبات والفروض إلى عليا لكن والله بحاول اني اظبط الحال

الخمس اسئلة اللى جاية دى اسئلة متنوعة

الاول : اكتر عيب فيك ونفسك تتخلص منه
الكذب اقدر اقول لك اني اكتر واحده لو اتحطيت فى موقف صعب باكذب وبكل قوه وبيبقي كذب ايه متقن ومحبوك درامياً ولالله المفروض كنت اطلع سيناريست
الثانى : ايه الحاجة اللى عملتها وندمت انك عملتها قوى
فى مشكله انا كنت وقعت فيها والمشكله دى انا كنت السبب فيها وندمت لان المشكله دى سببت ليا مشاكل فى بيتي ومع جوزى لكن والحمد لله المشكله اتحلت بس بجد انا ندمت على ما فعلت .
الثالث : اية الحاجة اللى لسة معملتهاش وهتموت وتعملها
نفس اتعلم السواقه وجوزى مش عاوز يعلمني بيقولي لما تبطلي رعب وخوف ابقي اعلمك اصل مره وهو بيعلمني لقيت عربيه جايه عليا رحت سايبه الدركسيون وحطيت ايدى على عيني لكن والحمد لله هو اتصرف وشد فرامل اليد ومن يوميها قالي لما تكبرى ابقي اعلمك .
الرابع : اكتر دعاء بتقوله وبتردده دائما
اللهم لا الله الا انت سبحانك اني كنت من الظالمين
سبحان الله وبحمده سبحان الله العظيم
خامسا : لو عرفت انك هتموت دلوقتى وقالولك اخر حاجة نفسك فيها ايه
اموت وربنا غافر لي وراضي عني
خلصت الاسئلة ودلوقتى لازم ابعت التاج إلى كل من
حبيبتي فى حب الله – اجمل ايامنا
فراشتي الصغيره – الفراشه الصغيره
بنت بلدى المصرية – مين فين ليه